Respublika Təcili və Təxirəsalınmaz Tibbi Yardım Mərkəzinin Şamaxı Təcili Tibbi Yardım Stansiyasına 03.10.2024-cü il tarixində saat 01:00 radələrində 60 yaşlı (kişi cinsli) şəxs üçün sinəsində ağrı, ürəkbulanma, ölüm qorxusu hissi yaranması səbəbilə çağırış daxil olub. Çağırış ünvanına təcili tibbi yardım briqadası cəlb edilib.
Aparılmış elektrokardioqramma (EKQ) müayinəsinə əsasən pasiyentə transmural miokard infarktı diaqnozu qoyulub, venadaxili ağrıkəsici yeridilib, oksigenoterapiya aparılıb, zəruri tibbi yardıma başlanılıb.
1 ay əvvəl açıq ürək əməliyyatı olan şəxsdə tibbi yardım zamanı qəfil ürək dayanması qeydə alınıb. Dərhal tətbiq olunan CPR texnikası ilə ürək fəaliyyəti ardıcıl iki dəfə olmaqla bərpa edilib, pasiyent intubasiya olunaraq süni tənəffüs aparatına qoşulub.
Pasiyent növbəti müayinə və müalicə məqsədilə Şamaxı Müalicə Diaqnostika Mərkəzinə təxliyə edilib. Hazırda şəxsin vəziyyəti stabildir.
Şamaxı Təcili Tibbi Yardım Stansiyası:
Həkim: Cavid Qurbanov
Sürücü: Rauf Mirzəyev
